شرح لعبة البلوت (1)

أسامة عبدالله
00

البلوت سهله جدا.. سهولتها فوق ما تتخيل.. الصعوبة فيها بالتحايل وسط اللعب، وتقييم الموقف، ومتى تتخذ قرار داخل اللعبة.. 

نبدأ بتعريف البلوت:

البلوت باختصار:

٤ اشخاص يلعبون مع بعض وكل واحد يرمي ورقه بالأرض ونشوف مين صاحب الورقة الأكبر، واللي يكون صاحب الورقة الأكبر راح يعلب مره ثانية وبعده نشوف مين أكبر ورقه ونستمر كذا لحد ما تخلص كل الأوراق اللي معنا..

هاذي هي البلوت سهله جدا.. كل اللي عليك تعرف ترتيب الورق وهذا أمر أسهل.. شف هذا ترتيب الورق:

خلنا ندخل باختبار سريع

وش أكبر قطعة...؟


الجواب:

الأكه


سؤال ثاني:

وش أكبر قطعة...؟

الجواب:

العشرة

 

سؤال ثالث:

وش أكبر قطعة...؟

الجواب:

البنت

 

ممتاز أنت الحين عرفت أساس البلوت.. اللي هو أنه صاحب أكبر ورقه راح يفوز بكل الأربع أوراق وراح نسميها (أكله).. يعني إذا كل لاعب رمى ورقة راح نسمي الأربع أوراق المرمية بالأرض أكله..

 

أكيد جاء برأسك ٥٠ سؤال..

خلنا نأخذهم واحد واحد

ولا تدري خلنا بالبداية نتعرف على أشياء أساسية بالبلوت:

1- البلوت لازم يلعبونه ٤ لاعبين وكل اثنين قدام بعض هذولا فريق.

2- عدد ورق البلوت ٣٢ ورقة.. كل اللي عليك تطلع من كل شكل (٦ و٥ و٤ و٣ و٢) وترميهم بالزبالة.. هالأوراق ما راح نلعب فيهم.. وأكيد الجوكر ما راح نلعب فيهم.

3- يتبرع واحد ويأخذ الورق ويخبصهم.

4- وبعده يبدأ الموزع يوزع ٣ أوراق لكل لاعب بعدين ورقتين لكل لاعب بعده ٣ أوراق لكل لاعب.. راح يكون مع كل واحد ٨ أوراق.. (أكيد بتقول شرحك غلط.. طول بالك على وتابع الشرح وأضمن لك تحترف البلوت).

5- البلوت عكس عقارب الساعة.. يعني دايم كل شيء بالبلوت راح يكون من يمينك، واللي يمينك يمينه وزي كذا

 

طيييب الحين جينا للأسئلة اللي برأسك:

1- مين يلعب أول...؟

اللاعب اللي يمين الموزع هو اللي راح يرمي أول ورقة.

2- طيب أي ورقة أرمي...؟

البلوت يفوز فيها أكثر فريق يأكل.. يعني حاول تجمع أكبر ورق ممكن ف مثلا لو ورقك كذا 

وزي ما شرحنا انه ترتيب ورق البلوت كذا:

ف كل اللي عليك تلعب أكبر شيء عندك وتأكل أكثر ورق

نجي لسؤال الثالث:

طيب باقي اللاعبين وش يسوون...؟

باقي اللاعبين لازم يلعبون نفس الشكل اللي أنت تلعبه وإذا ما معه نفس الشكل عادي يرمي أي ورقه.. لكن ما راح يكون لها أي قيمة.. وتعتبر أصغر ورقة

 

آها اكيد الحين تفكر بالسؤال اللي فجر مخ كل واحد بيلعب بلوت:

طيب لو أنا أول لاعب ورميت أكه واللي بعدي ما معه زي شكل الورقة اللي لعبته وقام ورمى أكه من شكل ثاني.. مين يأكل بهالحالة...؟

أكيد بياكل اللاعب اللي رمى أول كرت.. حنا نشوف أول لاعب رمى ورقه ونلعب زيه وأكبر ورقه من نفس الشكل (فقط نفس الشكل) اللي لعبه أول لاعب هو اللي يفوز.. يعني اللاعب الأول يحدد الشكل ويرمي أول كرت واللاعبين اللي بعده يرمون زي الشكل بعده نشوف مين أكبر واحد والأكبر يأخذ الأكلة ويلعب كرت ثاني ونستمر لحد ما تخلص الأوراق..

طيب لو انا أول لاعب ولعبت (7الشريا) وكلهم ما معهم نفس شكل الكرت اللي لعبته بهالحالة مين أكل...؟

زي ما قلنا نشوف مين لعب أول واحد..

أول لاعب لعب 7 (♣️) ف هو اللي أكل الأكلة..

 

بالختام بعطيكم معلومة بسيطة:

إذا انت أكلت المفروض خويك يشيل الأوراق اللي بالأرض ويقلبهم قدامه عشان تلعب بسرعه

لأنه لو انت بتشيل الأوراق بتجلس اللعبة ساعة ما خلصت.. لأنه لازم تشيل بعدين تفكر وش تلعب بعدين تلعب بعدين تشيل ثانيه ف يتأخر اللعب كذا.. ف عشان كذا قالوا اللي أكل خويه يشيل عشان يساعده يلعب بسرعه

 

ملخص الشرح:

1- صاحب أكبر ورقة راح يأكل.

2- إذا ما معي نفس الشكل اللي لعبه أول لاعب ترمي أي كرت ونعتبره أصغر كرت باللفة هاذي.

3- إذا انت أكلت خويك يشيل الأكلة.. وإذا خويك أكل انت اللي تشيل الأكلة.

 

إذا انت وصلت هنا تابع الشرح اللي بعده وصدقني بتكون أفضل لاعب بلوت.

اقرأ أيضاً من شرح البلوت

التعليقات 0